• Facebook
  • Twitter
  • Youtube
En
Հյ
Ру

Բացահայտելով Հայաստանը

Հնագույն մշակույթ և ժամանակակից հյուրընկալություն

Arrow
Հայաստանն իր պատմության լավագույն էջն է գրում՝ հավատարիմ մնալով դարերի ընթացքում կերտված իր հարուստ պատմամշակութային ժառանգությանը: 2018 թվականին «Էկոնոմիստ» (The Economist) հեղինակավոր ամսագիրը Հայաստանը ճանաչեց տարվա երկիր. նույն թվականին լրացավ մայրաքաղաք Երևանի հիմնադրման 2800-ամյակը: Երևանը 29 տարով մեծ է Հռոմից:

Երևանը հնի ու նորի միախառնումն է. բացահայտեք տարբեր ճարտարապետական ոճերն ու դարաշրջանները այցելելով մոնումենտալ Հանրապետության հրապարակ, հայ-իրանական բարեկամության խորհրդանիշ դարձած «Կապույտ մզկիթ», իր տեսակով յուրօրինակ Կասկադ համալիր, հանրահռչակ Ալեքսանդր Սպենդիարյանի անվան օպերայի և բալետի ազգային ակադեմիական թատրոն և Երևանի գողտրիկ անկյուն դարձած՝ Սիրահարների այգի:

Եթե դուք հետաքրքրվում եք պատմությամբ, խորհուրդ ենք տալիս այցելել սովետական մոդեռնիզմի տիպօրինակ հանդիսացող Տիգրան Պետրոսյանի անվան շախմատի տուն, Կարեն Դեմիրճյանի անվան մարզահամերգային համալիր, նախկին «Ռոսիա» կինոթատրոն, «Մոսկվա» կինոթատրոնի ամառային դահլիճ, «Մարշալ Բաղրամյան» մետրոյի կայարան և այլ հիշարժան վայրեր:

Քաղաքը շնչում է բացօթյա սրճարանների և զվարճավայրերի անդադար աղմուկով: Արվեստասերներին Երևանը առաջարկում է բացահայտել Ազգային պատկերասրահը, Սերգեյ Փառաջանովի և Մարտիրոս Սարյանի տուն-թանգարանները: Մեկ այլ հանգրվան է Երևանի կոնյակի գործարանը, որտեղ՝ «Արարատ» թանգարանում, դուք կարող եք ծանոթանալ կոնյակագործության դարավոր ավանդույթներին և համտեսել հռչակավոր «Արարատ» կոնյակը:

Arrow
Հայաստանը գեղեցիկ երկիր է՝ մայրաքաղաքից մինչև արվարձաններ, իր տպավորիչ լեռնաշղթաներով, երկարուձիգ կիրճերով, խաղողի այգիներով, չքնաղ Սևանա լճով և այս պատկերները շրջանակող բիբլիական Արարատ լեռով:

Հայաստանում բնությունը վայելելու հնարավորություններն ամենուր են. յուրաքանչյուրը կարող է գտնել այն, ինչ փնտրում է՝ գեղատեսիլ լճի շուրջ մեղմ զբոսանքից մինչև արկածախնդիր էքսկուրսիաներ, արշավներ, լեռնագնացություն, հեծանվավազք, թռիչք օդապարիկով: Մի շրջանցեք Սևանը՝ Կովկասի ամենամեծ լիճը, որտեղից կարող եք տեսնել 874 թվականից վեր խոյացող Սևանավանքը: Արկածասերները կարող են այցելել «Յելլ» էքստրեմալ զվարճանքների այգի, որը հայտնի է իր ճոպանագծերով: Օրվա ավարտին լիցքաթափվեք՝ համտեսելով արևի բույրով հարուստ հայկական գինիներ՝ «Զորահ», «Կուր», «Ոսկենի» կամ «Արմաս»:

 

Arrow
Հայաստանն աշխարհում առաջին երկիրն է, որ քրիստոնեությունն ընդունել է որպես պետական կրոն: Երկրով մեկ դուք կտեսնեք զարմանահրաշ եկեղեցիներ՝ շրջապատված բնության անկրկնելի պատկերներով:

301 թվականից ի վեր, երբ Հայաստանն ընդունեց քրիստոնեությունը, կրոնական այդ ժառանգության դարավոր շունչն ապրում է երկրով մեկ սփռված վանական համալիրներում և եկեղեցիներում: Դրանք աշխարհում եզակի հուշարձաններ են՝ Էջմիածնի Մայր տաճարից (քրիստոնեական առաջին մայր տաճարն աշխարհում) մինչև Գեղարդ (կիսով չափ ժայռափոր վանական համալիր), անտառներով շրջապատված Հաղարծին ու Տաթև՝ միջնադարյան հայկական ճարտարապետության գլուխգործոցներից մեկը: Տաթևի վանական համալիր կարելի է հասնել «ՏաԹևերով»՝ աշխարհի ամենաերկար հետադարձելի ճոպանուղով, որն անցնում է Որոտանի կիրճով:

Arrow
Հայաստանը պատմական բազմաթիվ հուշարձանների երկիր է՝ Ուրարտուի ավերակներից մինչև հեթանոսական տաճար և միջնադարյան ամրոցներ:

Հայաստանի հարուստ մշակութային պատմությունն արտացոլված է հուշարձաններում և պատմական վայրերում: Արենիի 6000-ամյա գինու հնձանից մինչև Ուղտասարի ժայռապատկերներ ու Քարահունջ (կա վարկած, որ այն հնագույն աստղադիտարան է), Էրեբունու ավերակներ և Արևի աստված Միհրին նվիրված հեթանոսական տաճար, որը թվագրվում է մեր թվարկության առաջին դար. եկել է Հայաստանը բացահայտելու ժամանակը:

Arrow
Հայաստանը Եվրասիայի ամենալավ պահպանված գաստրոնոմիկ գաղտնիքն է: Եթե գալիս եք մշակույթը բացահայտելու, կմնաք խոհանոցը վայելելու:

Հայկական խոհանոցը տարածաշրջանում հնագույններից է, որտեղ հատվում են Արևելքն ու Արևմուտքը, ինչպես Հայաստանն է իր դիրքով: Այս մասին է վկայում նաև National Geographic-ը, որը Երևանը ներառել է իր «Վեց անսպասելի քաղաքներ՝ ուտելիքի սիրահարների համար» ցանկում: Համտեսեք խորովածը, տոլման, ղափաման, ձուկն ու Սևանի խեցգետինը, հայկական պանիրն ու չորամրգերը, վայելեք դրանք հայկական կոնյակով, գինով ու գարեջրով: Ահա մի քանի վայրեր, որոնք առանձնացրել ենք ձեզ համար. այցելեք «Դոլմամա», «Ոստան», «Շերեփ», «Լավաշ», «Ծիրանի», «Մայրիկ»:

Aurora

Հայաստանը բացահայտելու համար լրացուցիչ տեղեկություններ կարող եք գտնել մեր գործընկերոջ մոտ:

Go2Armenia